Guruvayoor Ambalanadayil: “`அழகிய லைலா’ பாட்டுக்காக இதுவரை எங்கிட்ட படக்குழு பேசல!” – சிற்பி ஆதங்கம் | Music Director Sirpy about trending Azhagiya Laila Song

“நான் இன்னும் படம் பார்க்கல. நண்பர்கள் மூலமாத்தான் கேள்விப்பட்டேன். இதுவரைக்கும் படக்குழுவினர் யாரும் என்கிட்ட பேசல. என் பேருக்கு கிரெடிட் போட்டாங்களான்னும் தெரியாது. ’அழகிய லைலா’ பாடலின் உரிமை யாரிடம் இருக்கோ அவங்களுக்குத்தான் சொந்தம். ’உள்ளத்தை அள்ளித்தா’ உரிமையைத் தயாரிப்பாளரிடமிருந்து ’லஹரி’ மியூசிக் வாங்கியிருக்காங்க. அவங்களுக்குத்தான் உரிமை இருக்கு. அவங்கதான் பர்மிஷன் கொடுக்கணும். என்கிட்ட பர்மிஷன் வாங்கணும்னு அவசியம் கிடையாது. அதுல எந்த மாற்றுக்கருத்தும் கிடையாது.

நான் லஹரி மியூசிக் நிறுவனத்துக்கு போன் பண்ணிக் கேட்டேன். அவங்க முறையா அனுமதி வாங்கித்தான் பயன்படுத்தியிருக்காங்கன்னு சொன்னாங்க. ஆனா, அந்தப் பாடலின் இசையமைப்பாளர் என்கிற முறையில் என் பெயரை கிரெடிட்ல போடணும். அதுதான் என்னோட விருப்பம். நான் பணமெல்லாம் எதிர்பார்க்கல. தேங்க்ஸ் கார்டுலயாவது என் பெயரைப் போட்டிருக்கணும். அதுவும் போட்டாங்களான்னு எனக்குத் தெரியல. ஏன்னா, நான் இன்னும் படம் பார்க்கல. என் பேரு போட்டிருந்தா எனக்கு சந்தோஷம். நான் இசையமைத்த ‘அழகிய லைலா’ மட்டுமில்ல, ’கொட்டப்பாக்கும்’, ’ஏலேளங்கிளியே’, ’செவ்வந்தி பூவெடுத்து’ பாடல்களெல்லாம் இப்போ ட்ரெண்டிங்கில் இருக்கு” என்கிறார் உற்சாக துள்ளலோடு!

திரையரங்கில் வெளியாகி பெரும் வெற்றிப் பெற்ற ‘குருவாயூர் அம்பல்நடையில்’ படம் தற்போது டிஸ்னி ப்ளஸ் ஹாட்ஸ்டாரில் வெளியாகியுள்ளது. அதில் நாம் பார்த்தவரையில் தேங்க்ஸ் கார்டு இடம்பெறவில்லை.